Artikel
nr. 1

’t Is lang leden, da’k reur west bin met babbelegoegies.

Mar ’t kan je vast niks schelen ,want ik heb al lang in de gaten, dat de schrieverij van Binkie veul meer op pries steld weur as mienende..

Toevallig las ik der lèest wat over in ien of aander blad en het bliekt dat alles wat deur dieren verteld wordt, slim bij mèensken in de smaak valt.

Bink kan zuk veul meer veroorloven as ik. ’t Is ja mar ’n hond en die wet ja niet beter.

Hie kraomt er van alles oet. Och, ik duur ok wal n grommegie deursloeken, mar over ’t algemien loop ik toch wat meer in ’t gareel zuw mar zeggen.

Trouwens, oes Binkie wordt old. Hie is al weer tien jaor. Waor blef de tied ?

Met dit hiete weer moe’k goed in de gaten holden, daw ’t niet te gek maakt met

’t lopen. En hie mag ok niet meer oet de stroom drinken, want körsdaags was e al flink an de diarree.

Kiek, daor hej weer zo iets. Zölf zul e zeggen, dat e an de schijt was en dat ’t hum van ’t gat of flodderde , mar in mien hoedanigheid proot ik netties over diarree.

 

Ach, ik hoop dat e nog hiel lang bij mij blef en dat hoopt mien Geert ok, want die zeg aaid : ”As die hond wat overkomp, dan beleef ik wat met mien vrouw ”.

 

Hej dat ok wal ies, daj zo slecht in slaop komt ?

Dan giet er van alles en nog wat deur je hen.  Mar slaopen, ho mar !!! Manlief hef daor gien last van, hie leg de kop op ’t kussen en  zzz....zzzzz....zzz....mien Geert slap !!  Ikke niet......ik lig as ’n gek te vruten.

 

Iene, twieë, drieë......schaopies tellen....veere, viefe...zesse........oeps, een neefie !!     Ik trek an ’t touwgie boven ’t berre, want ik moe der achterheer, aans zit ik mörgen under de jokbulten. Mien wederhelft wordt wakker van ’t felle locht en begunt te foetern van heb ik jou daor. En geliek hef e ! As ’t neefie sneuveld is, haal ik ’n beker warme melk, dat wul ok nog wal ies helpen. Allennig dit keer niet, ik krieg gien wenk in d’ogen.

Mien moe zee eerder aaid a’k niet slaopen kun, dat ’t zandmannegie mij vergeten was. Die har mij zand in d’ogen moeten strooien. Kan niet aans, dat möt ’t weden !!

 

Mien moe was altied drok in de weer met dat soort dinger. Ok met riempselties op namen, dat vun ze prachtig en ik as kind knupte alles dekseks goed in mien oren.

Ien zu’n riempseltie hef slim veul indruk op mij maakt. De grauwel kreup mij der van over de hoed !!! En nog !!!

Tja, aj Henk hietten, dan haj ’t niet tröffen. Ik vraog mii of, of dergelijke taol wal deur de beugel kan, mar ik doe ’t lekker toch. Ik hoop, dat de baos van oes eigen kraantie

’t goed vindt, want ’t is een barre lugubere heur ( ik bedoel dat riempseltie ).

 

Hol je vast :  Henke stenke stiel

houwt zien vaoder met de biel,

houwt zien moeder met de hamer

dood in duustre kamer.

Nou ????????

 

Zoeken in de site

Willekeurige foto