Artikel
nr. 4

 

Zweeloo, kunstenaarsdorp !!!

Tja..einlijk zulden wij Zweeler met de börst veuroet moeten lopen van trotsigheid, mar dat lig toch wal ’n beetie aans.

Wij schaamt oes d’ogen oet de kop veur al die verpauperde gebouwen in oes dörp. De gezelligheid is wied te zuken !

Iene Jan Seubring oet Aalden trök as eerste an de bel met ’n stukkie in oes eigen kraantie. Hie vun, dat er as de gezwinde weerlicht wat gebeuren mus.

Gelukkig stak der ies weer iene de kop boven ’t meiveld oet.

En of e geliek hef !!

Een toertie later stun der een bord met GEKRAAKT er op, bij wat vrogger

’t gemientehoes en later een underdiel van de Rabobank was.

Verder stunden der ok nog een stuk of wat schilderijen op paolties.

’t Har wal wat weg van graffity, maar dat ziej in de regel op muren.

Dende die daor reur west is, hef zuk nog netties gedragen, want op met graffity beschilderde muren zit ja ok gieniene te wachten !

 

Mar ’t is denk ik toch ’n tieken, dat de bevolking zo zachies an hiel veurzichtig in ’t geweer komp !’ Ik dacht : ”Eindelijk wat reurigheid in de tent !” Hè man, ik sluup der die nacht ja glad beter van en ..................

 

Ik har een hiele mooie dreum !!

 

t Was bij zommerdag en ’t olde pand van Seubers was hielemaol opknapt.

Het zag der zo mooi oet !  Mar ij weet hoe ’t giet hè, in dreumen is alles niet aaltied zo dudelk, dus ik kan je niet vertellen wat of ’t kost hef. Daor gao ik ok ja niet over. Alhoewal , een likkie varf döt vaak al wondern !

’t Water in ’t stroompie was glashelder en der bluiden overal de prachtigste bloemen in alle geuren en kleuren. Der was een oogverblindend terras, waoras  de vrolijke vissers under ’t genot van ’n pilsie ’t er over hadden, hoe zukke grote vissen as ze wal niet vangen hadden. En geleuf mij mar rustig : zie weurden aal groter !!!

As de temperatuur steeg tot tropische waarden, dan kunden ij zo langs speciaal aangelegde trappies naor beneden de stroom in um verkoeling te zuken.

Pootie baden !!

Achter ’t gebouw was een soortement van dierenkampie met van die snoezige hangbuukzwienties en verder wat aaibaar spul veur de kleine kinder.  Daan en Roos stunden der ok met de snackbar en aans nog een ijscokarregie, dus veur elk wat wils. Binnen in ’t gebouw was plek veur alle koren van ’t dörp, waoras ze umstebeurten gebroek van kunden maken. De biljarters kunden der terecht en der zaten ok nog een paar kleine winkelties in, waoras ze allerhande Drèentse spullegies verkochten en Albert Hilbrands har der ’n winkeltie, waoras de lekkerste kees van hiel Drente te koop was. En der hungen hiele mooie schilderijen in wat ze een galerie nuumt. Non ja, ik kan nog wal ’n toertie deurgaon. Het was te mooi um waor te weden !

 

Zoeken in de site

Willekeurige foto