Artikel
nr. 7

Veurige week bin’k hen de vergadering van dörpsbelangen west.

Het gung over van alles en nog wat, mar een paar dinger spreuken mij toch wal arg an. Bijveurbeeld, een paar kinder, die slim geern een speultuuntie wolden. Zie hadden een hiele koppel handtiekeningen verzameld en die beuden ze de veurzitter an. Da’s toch geweldig ?

’t is ja ok agil gien slecht idee, want dan bint ze tenminste van de straot of en daormet kom ik geliek op ’t volgende punt, ’t is levensgevaorlijk op straot, umdat hiel veul mèensken veuls te hard riedt bij oes op ’t dörp.

Mar wel bint dat dan, die mèensken ? Non in de zaal bij die vergadering daor zaten ze niet. Tuurlijk niet ! Ik ok niet.

Gieniene döt ’t en toch gebeurt ’t !

En met ’t schaamrood op de kaken geef ik bij dizze eerlijk toe, dat ik ’t ok wal iens doe ! Niet meer zo vaak as vrogger, want toen he’k ’t iens presteerd da’k in tied van hoogoet twintig minuten twie keer op de bon slingerd weur in

 

Noord-Slien. Op de henreis en op de weerumreis !

 

Toen he’k dus flink leergeld betaald !

Mar ’t was mien eigen schuld, dikke bult.

Ach, allennig een speultuuntie veur de kinder löst natuurlijk ok niet alles op.

Kinder moet ok over straot hen schoel en zo en dat möt goed vertrouwd weden. Toch ? Ik heb ’t harde rieden wal ofleerd en hol mij netties an de maximum snelheid. As iederien dat non döt, dan huuft er ok gien acties undernummen worden, zoas auto’s op de riebaan parkeren, of wat dan ok.

Mien schrieverij komp misschien wat eigenwies over, mar ik dacht : ”A’k ’t non iens gewoon op zien Drèents breng, wel wet.”

 

Aj mij dus deur ’t dörp ziet rieden en ij denkt : ”Wat hef dat vrouwgie toch weinig gang op de ket”, dan weej waoras ’t van komp : ik bin bezig um ’t goeie veurbeeld te geven.

Zunder al te veul moeilijke woorden, want da’s ok belangriek !

Kiek want een verticuteermachine is niks aans as een mosverwijderaar en op zien Drèents een mosropper. Toch ?

 

En non ’k toch over ’t Drèents heb.......

Kiek ij wal iens naor Taoltalent op tv Drente ?

Abel Darwinkel van ’t Huus van de Taol har mij vraogd , wat ik der van vun.

Ik heb hum schreven, da’k der niet vrolijk van weur. En al hielemaol niet van die oetspraak van de ien of aandere schriever : ”Ik bin der veur, dat kinder Drèents leren, mar niet die van mij, die gaot studeren.” Zó laatdunkend !!!

 

Het is hiel goed meugelijk um èn te studeren èn Drèents te leren !!!!!!

 

Zoeken in de site

Willekeurige foto