Artikel
nr. 9

Hej dat ok, daj zu’n hekel hebt an dat geschooi an de deur ? 

Dan bi’j net argens drök met bezig en ring......... de bel !

Stiet dat mèensk met dat zwarte siepie weer veur de deur met ien of aander collectebussie. Der is altied wal wat. De iene keer is ’t hierveur en de aandere keer weer daor veur, ij kunt wal an de gang blieven.

Een toertie leden kwam ze veur kinderhulp.

 

Kinderhulp ?? Ja, veur kinder, die beveurbeeld gien olders meer hebt en in ien of aander tehuus zit. Die arme stumperds wult met sunterklaos ok geern een kadoogie hebben. En smangs hebt ze misschien wal iens een neie fiets neudig, of wat dan ok. Ja, dank je de koekoek !

 

Wat heb ik met aandermangs jongen te maken ?

En dan die hartstichting ! Der is ja niks mis met mien rikketik.

Of het gehandicapte kind ! Oezenden bint goed gezond, dus ik heb der gien bosschup an.

En de kankerstichting, da’s ok zo wat. Waor blef al dat geld ?

Komp ’t wal op de goeie plek terecht ?

En smangs dan  bedelt ze weer veur landen, die tröffen bint deur overstromings of aardbevings of weet ik veul wat. Nou, dat is een ver-van-mien-bed-show ! Ik eet er gien dikke karbonade minder um. Zie bint bij mij an

’t verkeerde adres. Ik laot mij ’t geld niet oet de buus kloppen.

Die twiede auto veur de deur is oes al duur zat. En...wij bint neudig an een neie kleurentillevisie toe en.... dan doew ’t ok geliek goed, dan koop wij der iene met alles der op en der an.

Een grootbeeldformaat ! Dan liekt ’t net as oj in de bioscoop zit !

En denk er um : wij wult ok nog drie keer in ’t jaor op vekaansie, aj dat mar weet.

 

Dat mèensk met dat zwarte hondtie wordt er niet hiet of kold van. Ze zeg, daj wieder moet kieken, dan dat je neus laank is.

En... dat ze ’t niet veur zökzölf döt ! En daj zölf ok wal wat kunt kriegen.

Smangs kuj ja zo mar an de beurt weden !

Mar, zeg ze : gelukkig valt ’t best met.

De mieste mèensken bint hartstikke aordig en geeft zunder te foetern wat vort.

En ze hef alle respect veur welkenden, die ’t echt niet missen kunt.

En of ’t geld wal goed terecht komp ?

Ja, dat wet ze ok niet. Alles weten maakt ok ja niet gelukkig. Ze gef elkenien, die zök inzet veur goeie doelen gewoon het veurdiel van de twiefel.

 

Makkelk zat !

 

Zoeken in de site

Willekeurige foto