.

.

 

.

De aoventuren van Binkie (deel 2)

Hej ’t lezen in de kraant ?
Het was ’n stukkien in verband met Werelddierendag.

Zie schreven, dat een hond die proten kun, toch wal wat ver gung.
Ik vin, dat ze niet goed wies bint !
Het zit namelijk zo : ik wul proten, dus kan ik proten. Makkelk zat !


’t Vrouwgien zeg altied : ”Kan ik niet lig op ’t kerkhof en wul ik niet lig der naost”. Wat ’n mooi spreekwoord hè ? Ze kent er nog veul meer.
Die hef ze allemaol ontholden van vrogger van heur moe.
Die zee bijveurbeeld, aj argens de spot mee dreven : ”Hol je mar stil, want spottershoesies braandt nog wal iens.” Of as iene Aoltien hiette, dan zee ze : ”Aoltien zat op paoltien, wup zee ’t paoltien en weg was Aoltien.” Bij iene met de naam Gees gung ’t van : ”Geese gaase goesegat, die achter op de bolle zat, de bolle begunde te springen en Geese begunde te zingen.”
En as de plietsie der ankwam, dan mompelde ze : ”Plietsie plietsie, blauwe broek hef vannacht in berre poept.
Waorum hef e dat dan daon ? Plietsie wus de pot niet staon !”
Mar pas as de plietsie ’t niet meer heuren kun natuurlijk, want ze was bang, dat ze aans in ’t hok kwam.
Dus Oebel, luuster mar iens goed, aj oes tegenkommen bint.
Non ja, Drèents proten da’s gien prebleem, want ’t vrouwgien is ’n geboren Noord-Sliener. Toen ze nog ’n klein wichtien was, toen haj ok nog Zuud-Slien, mar dat wordt non gewoon Slien nuumd. ’t Sliener volk har vrogger haost altied ’n hoekien bonnen bij hoes en daorum weur der ok vaak ”bonnen Slien” zegd.
Erpel derbij en ’n stukkien oetgebakken spek van ’n zölfgeslacht zwien was zu’n beetien dagelijkse kost.
Der bint vast nog wal old-Sliener, die dat nog weet.
Toen ’t besluut nummen was, um de verhaalties in ’t Drèents te schrieven, kwam ’t schaopscheren an. IJ moet er hiel stief bij naodenken en ’t is ok nog iens an ’n hiele koppel regelties gebunden.
Gelukkig wul die aordige man, die vrogger dat stukkien van ”Ik en mien Gazelle” schreef oes wal op weg helpen. Dat hef e beloofd.
Non, vandaag bin wij ’n beetien ofdwaald, dat kwam deur al die riempselties.

 

Volgende keer za’k vertellen wat ze aal met mij beleefd hebt, toen ik oet ’t asiel in Zweel kwam.
Woefff !!!

Plaats reactie

De redactie behoudt zich het recht voor, ingezonden reacties niet te publiceren, indien de redactie meent dat deze reactie onnodig kwetsend is, of beledigende inhoud bevat.

Informatie

Zweeloo-digitaal is een initiatief van en voor inwoners uit de regio Zweeloo en omstreken en voor iedereen die interesse heeft in de regio. Het is een niet-commerciële website. Als u aanvullingen, tips of journalistieke inbreng heeft ontvangen wij die graag. Wij kunnen onze website daar weer mee verbeteren.
Rechts hiervan kunt u het Contactformulier openen.

DB Sweel