Hoe is ’t je gaon met al die feestdagen ?
Bi’j der zunder kleerscheuren ofkommen ? Wij bint oet eten west ! ’t Baosien hef dokt, dus ’t vrouwgien en ik hadden de kost veur ’t kauwen.
Wij bint hen ’n hiel exclusief restaurant west.
Nee jong, niet hen Van der Valk of zo, dat vin wij veuls te oldbollig en ’t is der ok veuls te drok met dat soort dagen.
Wij bint met oes driegies mooi hen de Mac Donald west, want wij bint ’gek op Mac’. Wij waren zó an de beurt, want der was gien kip. Ik zal je vertellen, ’t was spectaculair ! Wij gungen deur de Mac Drive, ik zat achterin de auto en ik keek mij de ogen oet de kop !
Wij kwammen al hiel vlot bij ien of aander loekien, ’t vrouwgien beug zuk veur ’t baosien langs en ze zee : ”Twie keer Big Mac menu”!
Tjonge jonge, de techniek stiet vandaag en de dag toch ok nargens meer veur, want ik heurde wal iene weerum proten, mar ik zag niks.
Of ze der ok fritessaus bij wolden en wat veur drinken as der bij mus.
’t Vrouwgien zee, dat ze aardbeienmilkshake wol en inderdaod ok fritessaus en.....’n bot veur de hond. Ziezo ! Dat klunk mij as meziek in de oren.
Ik heur der ok bij !
En daor gungen wij weer, op naor ’t volgende loekien. Daor was wal volk en ’t baosien kreeg een puut in de handen drukt met alle spullegies en toen hew de auto an de kaant zet. Wij hebt niet eten, wij hebt vreten !!
As ’t vrouwgien dit stukkien veur mij schref, is ’t dönderdagaovend en old en nei stiet veur de deur. Euliebollen, appelflappen, knieperties en rollegies, al die zutigheid stiet dolkies weer op ’t menu. Op ’t langelèest komp ’t je de strot oet.
En aj je niet waart, dan grui ij as kool.
Dus, dan moej in ’t neie jaor weer extra hen de sportschoel of zo um de overtollige kilogies weg te warken. En hoe is ’t , bi’j ok al besmet met het fenomeen ”Nordic Walking”? Dat schient ok goed te weden veur de slanke lijn.
En ok veur hiel veul lichamelijke ongemakkies, he’k mij laoten vertellen.
Hiele toggels ( veurnamelijk ) vrouwen ziej met die stokken in de weer en dat döt mij ok agil gien nei.
Want an elk scheelt wal wat, ien an de kop en aander an ’t gat !
Een hiel gelukkig, gezond
en sportief 2007 !!!!
Woef !!!!!!!!
