.

.

 

.

De aoventuren van Binkie (deel 10)

IJ doet vast wal iens bosschuppen bij de Coop, want ’t is ’n veurnaam ding, daj oenze winkels op ’t dörp in stand holdt. Aans moej aaltieding hen Emmen of zo en denk er um, ij hebt de benzine ok niet veur niks.

Non kuj wal zeggen, daj ok nog op fietse kunt, mar aj ’n dikke hoesholding hebt, wul je ’t niet metvallen um alles met te slepen en ’t openbaar vervoer is ok niet alles.

Non, twie keer in de week, dan gaot ’t vrouwgien en ik hen de supermarkt.

Op de kuierlatten ! Ij moet je an ’t eten holden hè ?

 

Veuran daor bij de winkel en waor aj de kar pakt, daor hangt ’n bordtien met de tekst : ”U kunt hier uw hond achterlaten”. Ja, zie proot daor dunkt mij hoogop. Aj dus ’n klein zwart siepien ziet zitten, dan hej negen op de tien keer kans, dat ik dat bin. Binkie oet oes eig’n kraantien.

Aai mij mar niet heur, want ik bin levensgevaorlijk. Ik heb al iens eerder iene opvreten ! Nee heur, ij hebt zeker wal in de gaten, da’k je veur ’t lappien hol.

 

Hej veurige week dat stukkien ok lezen in ’t kraantien, waor boven stun dat ze ’n vrijwillige bijdrage van je wult hebben ? Non, zie hebt geliek ok mar even oet de doeken daon, dat ik ok gien puut extra voor krieg.

Wat is ’t toch ok wat niet ? Moe’k zeker de stok mar in de bek binden !

Mar ’t giet er wal goed um heur, ’k heb ’t ok agil niet zo op die dreuge brokken en ’k bin dik zat. Ik heb ’n goed kosthoes !

 

Weej nog wal, da’k ’t har over die vriendin van ’t vrouwgien ?

Dennende met dat rooie haor !

Non, ’t vuul met heur, ’t was mar nep, ’t kwam gewoon oet ’n pottien.

Zo non en dan doet die vrouwlu een kleurtien in ’t haor. Zie wult gien zulverdraoden tussen ’t gold. ’t Vrouwgien en ik vunden de kleur van die vriendin einlijk ok wal wat te grel, mar wij hadden besleuten um ’t mar stil te laoten geworden, want aj der wat van zegt, dan kuj der donder op zeggen, dat ze ’t juust nog ’n graodtien arger maakt. Aaltieding tegen ’t heil in ! Kiek, de mieste mèensken hebt ien hond of hielemaol gienende. Toch ?

Mar het hef der geliek drieë anschaft. Non ja, ’t bint mar hiele piepkleinties heur, zie bint van ’t mark ’teckel’. Aj ze goed bekiekt, bint ’t net van die frikadellegies op pooties. Zie hiet Dirk, Dorus en Job en wij akkedeert goed met mekaar. Op dinsdag en op dunderdag gaow der met zien allen op oet. Hiel veul kilometers leg wij dan of, wij gaot echt overal hen. Zeg mar, deur de bos en deur de heide. En dat ’t vrouwgien van die hondties smangs wat malle fratsen hef, dat kan mien vrouwgien niks schelen, want as ’t puntien bij ’t paoltien komp, is ’t ’n best wicht en zie bint vriendinnen veur ’t leven, die twieë.

 

Hopenlijk nao vandaag ok nog !!!!           Woef !!!!

Plaats reactie

De redactie behoudt zich het recht voor, ingezonden reacties niet te publiceren, indien de redactie meent dat deze reactie onnodig kwetsend is, of beledigende inhoud bevat.

Informatie

Zweeloo-digitaal is een initiatief van en voor inwoners uit de regio Zweeloo en omstreken en voor iedereen die interesse heeft in de regio. Het is een niet-commerciële website. Als u aanvullingen, tips of journalistieke inbreng heeft ontvangen wij die graag. Wij kunnen onze website daar weer mee verbeteren.
Rechts hiervan kunt u het Contactformulier openen.

DB Sweel