Vanzölf bin ik der veur
Dat kinder Drèents moet leren
Behalve die van mij
Die gaot studeren.
Körtsdaags was op oetneudiging van de Historische Veriening de Drèentse schriever Jan Germs bij café Hegen in Wisp. En het spreukie hierboven van Hans Heyting was veur mij een reden um veur het Drèents in de bres te springen, want het haor gung mij der recht van overeinde staon! Het was slim gezellig bij Wimpie, want Jan Germs kan ’t altied mooi vertellen. Mooi ok, dat mèensken die hier nog niet zo lang woont der ok waren. Dat is toch ’n tieken dat ze wal geïnteresseerd bint en dat döt een Drent deugd. En ’t is natuurlijk ok wal makkelk aj mekaar wat kunt verstaon. Het is agil niet neudig dat ze ’t ok proot, want daor he’k ‘n zwaor heufd in, dat ze dat ooit zult leren en dat huuf ok ja agil niet, want wij Drenten hebt ok Nederlands leerd op schoel en wij komt een aander geern tegemoet. Mar ja, de ’en’ die sloek wij gewoon in, dat heurt zo, daoran is te heuren daw oet Drente komt en daor biw mar wat groots op!
Het schrieven in ’t Drèents is bij lange nao niet zo moeilijk as sommigen denkt, ’t is eigenlijk mar een fluitie van een cent. Goed luustern en regelties leren, da’s ’t hiele eier eten!
IJ moet natuurlijk wal je Nederlands een beetie de baos wezen, want aans dan wordt ’t niks, want wat in ’t Nederlands een voltooid dielwoord is, dat is in ’t Drèents ok een voltooid dielwoord. Non kan ’t wezen, dat er dacht wordt, dat een Drent te dom is um te weten wat een voltooid dielwoord is, mar zó dom bint ze non ok weer niet.
Hiel vrogger hef der ies iene schreven, dat wij Drenten te lui en te beroerd waren um de woorden hielemaol oet te spreken, mar dat klopt veur gien meter. Ik lui ? Ik loop mijzölf geregeld veurbij! Mooie oetdrukking toch ? Net as iene die zeg, dat e met ’t haor hen de kapper möt en as ik vrogger te lang op berre lag, dan zee mien moe: oes wicht verslap zien verstand nog ies.
Het Drent wezen hef ien hiel groot veurdiel, zie bint miestal al rap twietaolig en…zo vertöl Jan Germs…underzuuk hef dat oetwezen…daj dan minder snel dement wordt!
Dat komp umdaw aal raozendsnel switchen moet van ’t ien naor ’t aander. De harsens wordt algedurig kraakt! Op de vraog hoe ’t vandaag en de dag met ’t Drèents giet antwoordde
Jan Germs: ’Eigenlijk wal goed, mar eigenlijk ok weer niet’.
Hie bedoelde dat er wal belangstelling veur is, ok wal wat de cursussen betreft en zo, mar kinder (ok zien eigen en mienende en juddende vast ok) wult het niet meer prooten.
Waor komp dat van ?
Vrogger was oes wereldtie natuurlijk mar klein, wij kwammen haost nargens en waren veul op mekaar anwezen en wij preuten Drèents tegen mekaar. Allennig op schoel tegen de mister gebroekten wij het Nederlands. Mar vandaag en de dag reist de Drenten ok de hiele wereld over en oet alle windstreken komt mèensken naor hier en dus moet wij smangs ok wal hoogop prooten, aans verstaot ze oes niet.
En daorum is ’t zo belangriek daw de Nederlandse taol goed leerd, mar het Drèents kan der best naost. Het iene bet het aander ja niet. En deurleren (studeren) kan net zo goed!
En toch..... aw een flink aantal jaoren wieder bint (dat wordt althans beweerd), dan is waarschijnlijk niet allennig het Drèents verdwenen, mar ok het Nederlands. Dan is Engels de voertaol! Mar dat is doemdenken. Zo wied is ’t nog niet, veurlopig draag wij Drenten het Drèents nog hoog in ’t vaandel, want wat heurt er non meer bij Drente as oeze taol.
Dus, asjeblieft mèensken blief prooten in ’t Drèents!!
Bron: Oes Eig’n Kraantien 07-01-2015
