Ik wens je hiele prettige dagen, een goed oeteinde en een spetterend begun!
Zo vlak veur de kerst kom ik nog evenpies wat babbelegoegies verkopen, want stel je veur dat OEK langs komp met een kerstpakket en ik mar zó weinig daon heb. Dan vuul ik mij vast hiel schuldig!
Oeps…is dit een hint…?
Oeps, ik heur je denken: is dit een hint? Nee heur, wat mij betreft holdt ze het geld mooi in de buus, dat he'k ok al ies angeven. Niet dat 't geld mij op de rugge gruit, mar ik bin tevreden met wa'k heb an materiële dingen. Tevreden is denk ik op dit moment het juuste woord, want zunder oes Bram is 't niet meer wat 't was. De glans is der wat of.
Lachen lukte nog net….
's Mangs kreg een mèensk net even wat te veul klappen um de oren en dan hej nargens meer aordigheid an. Der wordt wal ies zegt dat iene 't lachen vergaon is, mij was 't zingen vergaon. Lachen lukte nog net, mar dan as een boer met koezenzeer! Mar ik betrapte mij der zölf op, dat ik agil niet meer zung! En dat terwijl ik altied in 't gezang was. Overal, under de douche, op de fiets, in de auto en ok jaoren in een koor. Het was opiens stil!
Flinke schup under de kont verkocht!
En toen...toen heb ik mijzölf een flinke schup under de kont verkocht!
Ik kan wal an de gang blieven met klagen en stennen, het wordt er niet aans van, ik krieg Bram der niet met weer en der aal meer weer over praoten met aandern warkt ok niet, want de mieste aandern hebt 't altied slimmer. En dat is misschien ok wal zo, mar elk vuult zien iegen het beste!
Stomverwonderd
En waarachtig, het giet wat beter, ik was stomverwonderd da'k mijzölf weer heurde zingen. Ik schrök der haost van! 't Was nog niet van harte, 't was meer jeuzeln, mar toch!!
Non komt de feestdagen der an
En non komt de feestdagen der an, ik huuf niet meer bang te weden veur vuurwark, want ik was allent mar bang umdat Bram bang was, ik huuf niet meer 's aovends laat nog hen boeten bij weer en wind umdat Bram pissen of poepen mus veur 't hen berre gaon, ik huuf gien kapitalen meer oet te geven an de dierenarts, ik kan midden overdag een strandwandeling maken op Zandvoort of waor dan ok, enz, enz.
Tja, ieder naodiel hef zien veurdiel, mar de veurdielen weegt niet tegen de naodielen op!
Ik wens je hiele prettige dagen, een goed oeteinde en een spetterend begun!
Doe-oeg!
Oes Eig'n Kraantien
