.

.

 

.

Campern, een nei warkwoord?

“Wat is der mis met het oetzicht op de bushalte an de Kloosterdwarsweg??” Ik bin de leèste tied weinig an schrieven toekommen umdaw 't hartstikke drok had hebt. Wij mussen aal op vekaansie!

Evenpies weer hen hoes, het financiele plaatie weer op örde maken en dan gungen wij weer. Hier even hen en daor even hen, gien ontkommen an!

Buusdoeken en elektriche fietsen
Dat hoes van oes op veer wielen stun geliek weer te steigern van ongeduld.

En dus, hen de winkel, alles kopen, drinken, vleis, kees en erpel, ij kunt ´t zo gek niet op numen. Zwaor beladen op pad, want waor wij hen gaot, daor hebt ze gien winkels! En dan heb ik ´t alennig nog mar over de innerlijke mens, want der möt nog veul meer met, zoas beddegoed, kleren, een taofel en stoelen, handdoeken, theedoeken, schötteldoeken, waslappen en buusdoeken en elektriche fietsen enzovoort. Ik loop mij de bienen under de kont vort um alles veur mekaar te kriegen!

QR-code veur corona op örde
Oeteinlijk nog even hen de buren um te vraogen of ze weer veur de post en de tuun wilt zörgen en kieken of de tillefoon opladen is en of de oplader wal an boord is en....hiel belangriek....of de QR-code veur corona op örde is en dan kun wij half op apegapen op weg.

Vrömde plek
Even veurbij Zwolle, moew al weer reur, want Bram möt pissen. Dan loop ij argens op een vrömde plek, terwijl daj der aans nooit met vort huuft, ruumte zat achter 't hoes! Kan'k zölf mooi op de stoel blieven zitten!!

Poosie tillevisie kieken
Dan nog hier en daor een toer in eindeloze files en oeteinlijk koj daor waor aj hen wolden. Eten koken op drie gaspitties, terwijl daj der in hoes veer hebt en ofwaskern zunder ofwasmechien! Een poosie tillevisie kieken op een klein tillevisietoestellegie in plaots van op een zoveul centimeter breedbeeld en dan hen berre! Ok al weer ofzien, gien luxe boxspring! En bijna elke mörgen wakker worden op een aandere plek met oetzicht op zee of op de bargen. Wat is der mis met het oetzicht op de bushalte an de Kloosterdwarsweg??

Boetenlander in 't boetenland
De volgende mörgen op de fiets, in de blote billen want ij moet broen worden!

En dan komp je der iene achterop en die vindt daj niet snel genog an de kaant gaot. En ik geef je te raoden wat e zee! Es sind ja auch immer de blöde Holländer!

Dat zee e! Oeps, dat kwam hard an, ik was opiens een boetenlander in 't boetenland! Ik vuulde mij discrimineerd!

Tja, wat moej der ok in zu'n  boetenland, Nederland hef toch mooie plekkies zat!

Ik zal bliede wezen as 't ding straks de winterstalling weer in giet!

As de winter an brek....
Mar alle gekheid op 'n stokkie, ij hebt vast wal deur da'k je wat op de nak drei en dat alles wat ik hier boven schrief gien echte preblemen bint, mar luxe preblemen, want as de winter an brek en de camper argens under dak stiet, dan kiek ik elke dag vol ongeduld oet naor 't veurjaor. Dan gaow de wiede wereld weer in en kan ik mien geluk niet op!

Ik denk dat camperen een nei warkwoord is, want aj 't opzuukt, vin ij allennig mar kamperen en da's toch wat aans.

Ik camper, jij campert enz, kan best! 

Oes Eig'n Kraantien d.d. 19 oktober 2021

 


 

Plaats reactie

De redactie behoudt zich het recht voor, ingezonden reacties niet te publiceren, indien de redactie meent dat deze reactie onnodig kwetsend is, of beledigende inhoud bevat.

Informatie

Zweeloo-digitaal is een initiatief van en voor inwoners uit de regio Zweeloo en omstreken en voor iedereen die interesse heeft in de regio. Het is een niet-commerciële website. Als u aanvullingen, tips of journalistieke inbreng heeft ontvangen wij die graag. Wij kunnen onze website daar weer mee verbeteren.
Rechts hiervan kunt u het Contactformulier openen.

DB Sweel